Help
kgolo ya ekonomi — Sesotho sa Leboa
Tšwelopelo ya ditšhelete ya naga goba selete. Kgolo ye botse e akaretša koketšego ya tšweletšo ya dithoto le ditirelo tše di tšweletšwago ke ekonomi, le kaonafatšo ya sammaletee ya maemo a magareng a ditšhelete le kakaretšo ya go phela gabotse ya batho nageng goba seleteng seo. Ka bomadimabe, seo ga se direge ka dinako ka moka. Morago ga phuhlamo ya mmaraka wa dithoto wa boditšhabatšhaba ka 2008, dinaga tša go hlabologa tše mmalwa (bona “tlhabollo” le “dinaga tše di hlabologago”) di ile tša laetša go se gole ga ekonomi, gomme maemo a tšona a ditšhelete a phuhlama (go ba go fokotšega). Seo ke kgolo ye mpe ya ekonomi. Batho ba bantši ba ile ba lahlegelwa ke mešomo, mebušo ka boyona ya palelwa ke go lefela dikoloto tša yona, gomme diekonomi tša tšona tša ba boemong bja kgauswi le go ema. Le ge go le bjalo, dinaga tše di itšego tše di hlabologago di ile tša se angwe kudu ke phuhlamo yeo, le dinaga tše di hlabologago tše mmalwa (bjalo ka Brazil, Russia, India, China le Afrika Borwa) di ile tša tšwelela go ba diekonomi tše di golago ka lebelo. Kgolo ya ekonomi e ka lekanyetšwa ka ditsela tša go fapanafapana, e lego GNP (bona “tlhabollo” le “dinaga tše di hlabologago”), palomoka ya tšhelete ya ditšweletša setšhabeng, kelo ya mošomo, palo ya ngwaga ka ngwaga ya batho ba ba sa šomego ya batho ba ba swanetšego ke go amogela mohuta wo o itšego wa kabo ya leago, bjalobjalo. Le ge go le bjalo, motho o swanetše go gopola gore bogolo bja ekonomi bo bohlokwa kudu. Phuhlamo ya 1% kgolong ya ekonomi ya USA e na le diabe tše kgolo gape tše šoro go feta phuhlamo ya 1% kgolong ya ekonomi ya Afrika Borwa. Gabjale, diekonomi tše di golago ka lebelo ke tše di lego mo go se se bitšwago dinaga tša BRICS, e lego Brazil, Russia, India, China le Afrika Borwa.
