Help
mohlala wa ekolotši — Sesotho sa Leboa
Seabe se sa tlhabollo ya batho, bjalo ka madulo, moepo, tsela, moago o tee, kago goba protšeke ya bogolo goba raranego efe goba efe bofe e bago le sona tikologong ye e tsebagatšwago go yona. Mohlala ofe goba ofe wa ekolotši o na le ditho tše pedi, e lego maatla a seabe le bogolo bja lefelo bja seabe. Ka teori, mohlala wa ekolotši o ka ba wo “boima” eupša wa thibelwa sekgobeng, goba wa ba “bofefo” eupša wa tsenelela kudu sekgobeng. Dikago ka moka tša batho di na le ditlhoko tša sebešwa, dijo, le tahlo ya ditšhila. Tše gantši di katologa go feta tlhabollo ka boyona gomme sekgoba sa ekolotši se a hlalošwa goba go beelwa mollwane (bona “go beelwa mollwane”). Ditoropo, ditorotswana, boemafofane le ditsentšho tša intasteri di na le seabe se boima go tikologo gape le mehlala ya tšona ya ekolotši ye maatla kudu. Dipolasa mafelong a dinagamagaeng gape di na le mehlala ye bohlokwa ya ekolotši. Mafelo ka moka a boeti bja pabalelo ya tikologo le dikgwebo a na le seabe go tikologo (bona “mafelo a go robala a pabalelo ya tikologo”). Le ditselana tše nnyane tša go namela dithaba di na le mohlala wo o itšego wa ekolotši. Mafelo a go robala a manobonobo a pabalelo ya ekolotši ao a ikgantšhango ka go šetša tikologo, a na le mehlala ye boima ye megolo ya go makatša ya ekolotši, kudu ge a na le boemafofane bja praebete le bašomedi ba bantši. Yunibesiti bjalo ka Unisa e na le mohlala wo mogolo wa ekolotši. Nagana ka meago ka moka, moo bašomedi ba phakago dikoloi, mafelo a baithuti, ditirelo tša poso, ditlabakelo tša kgokagano tša mogala le inthanete tše di akaretšago thuto ye e se nago marobalo a baithuti. Ga ešita le Lefelo la Bohwa la Lefase la Motheo wa Tlhabollo le na le mohlala wo bohlokwa wa ekolotši wo o fetago lefelo le gannyane e lego la dinagamagaeng la dikwere kilometara tše mmalwa. Ka tlhago ya tšona, ditirelo tša sešole le dintwa di na le mohlala wo mogolo wa ekolotši. Tsošološo ya ba go huma bjalo ka mapatlelo a kolofo, mafelo a go ikhutša a go ka thelela lehlweng, ditsela tša dikoloi tša lebelo, ditsela tša go dirwa ke batho tša dikoloi tša di4x4, le tše dingwe tše ntši – ka kgegeo – di na le mehlala ye megolo ya ekolotši yeo gantši e sa elwego hloko. (Bona “ekolotši” le “phokotšo ya tikologo”).
