Help
boagi bja ekolotši — Sesotho sa Leboa
Khwaliti ya maikutlo le dipono tša batho ka tikologo. Mang le mang Lefaseng ke moagi wa tikologo ka kgopolo ye e nabilego ya lentšu le. Ba bangwe ba rena re “baagi” ba ekolotši ba “go loka” bao ba lekago go phela bophelo bja go šetša tikologo gomme re na le mohlala wa ekolotši wo monnyane ka mo go ka kgonegago (bona “mohlala wa ekolotši”). Ba bangwe ga ba na taba le mohlala wa ekolotši gomme ga ba leke go lekanyetša ka boomo seabe sa bona go tikologo. Nakong ye ya bjale ya theknolotši ya godimo, bomateriale le nyako ya go ba le dithoto, boagi bja go loka bja ekolotši ga se selo se bohlokwa. Mengwaga ye mmalwa ye lekgolo ya go feta, batho ba be ba phela bophelo bjo bonolo, bja go se laolwe ke theknolotši, mohuta wa bophelo bja go iphediša. Ba be ba phela ka khutšo le dihla tša ngwaga, go fetogafetoga ga boso, nako ya tlhago ya go boela sekeng ya go nona ga mobu, le kgotlelelo ya tlhago ya dibopego ka moka tša bophelo ka gare ga ekosestemo. Nakong ya Phetogelo ya Intasteri, tše ka moka di ile tša fetoga (bona “phetogelo ya intasteri”). Lehono, batho ba mmalwa ba ka hlalošwa bjalo ka baagi ba ekolotši ba “go loka”. Mokgatlo wa Tikologo o thomile ka bo1960 (bona “mošomo wa ekolotši”) ge borathutamahlale ba thoma go lemoga gore tikologo e senywa ke ditiro tša batho. Molawana wa tikologo o ile wa tsebagatšwa, la mathomo kua USA, gomme kua Canada gomme morago mo go nyakilego go e ba dinaga ka moka lefaseng, go akaretšwa le Afrika Borwa go khuetšo ya batho tikologong (bona “taolo ya tikologo”). Ka tsela yeo, se se “gapeletša” batho ka moka go ba baagi ba go loka ba ekolotši. Go fihla gabjale, mafokodi a molawana wa tikologo a feta kgole dikatlego. Ka boripana, meloko ya bjale ga se baagi ba go loka ba ekolotši. Go sa šetšwe melawana ka moka ya tikologo ya boditšhabatšhaba le bosetšhaba, tikologo e angwa gampe go ya boemong bjo bo hlobaetšago mo re kago bolela ka go kgodišega gore meloko ye e latelago e tla hwetša tikologo ye e fapanego kudu go tšwa go ye re e hweditšego.
