Help
go akaretša setšhaba — Sesotho sa Leboa
Go kgatha tema ga maloko ka moka a setšhaba go direng diphetho le tirišong ya diphetho mabapi le tikologo goba karolo efe goba efe ye nngwe seleteng se ba phelago go sona. Bjalo ka ge e tsebega, e ra gore eng le eng ye e dirwago e dirwa ka tumelelano le dikganyogo tša mekgatlo ye e amegago gape ya goba le kgahlego (diIAP) – go akaretšwa batho ba ba dulago mo, ke go re, setšhaba sa felo fao. Go akaretša setšhaba ke karolo ye bohlokwa ya pušo ya temokrasi ya matšatši a selehono. Molaotheo wa Afrika Borwa (Molao nomoro ya 108 wa 1996 [bona “taolo ya tikologo”]) o dira ditokišetšo bakeng sa go akaretša setšhaba sa lefelo go tšeeng dipheto tša tikologo gomme seo se hlalošwa gabotse ka mo go sa kamakegego molawaneng wa tikologo wa naga (NEMA, nomoro ya 107 wa 1998). Gabotsebotse, Molao wa Taolo ya Tikologo wa Bosetšhaba (NEMA), nomoro ya 107 wa 1998, o dira go kgatha tema ga setšhaba selo se bohlokwa taolong ya tikologo. Batho ba swanetše go akaretšwa go tlhabollo efe goba efe ye e rulagantšhetšwago lefelo la bona. Ka ntle le go tšeeng dipheto batho ba na le tokelo ya go akaretšwa go ditlhabollo gomme ba swanetše go ba le monyetla wa go ka holega ditlhabollong ka mokgwa wa go ba le, go fa mohlala, tokelo ya mošomo ye e kgethegilego, tokelo ye e kgethegilego ya go hloma magae ao go robalago baeti goba tokelo ya go rekiša dithoto le ditšweletšwa tša bona tše ba di dirilego ka matsogo moo.
