Help
go dira selo khomodithi — Sesotho sa Leboa
Phetošetšo ya dika tša tlhago tše di lego gona goba tša go dirwa ke batho, ditiragalo tša leago le setšo go ba methopo ye e holago. Go Thutafase, kgopolo ye e maleba kudu go selo se se lego gona seo se fetošwago go ba dikgoketšo tše go ka dirwago tšhelete ka tšona tša boeti. Kgwebong ya mohlakanelwa ya praebete le ya setšhaba toropo ye nnyane, ya kgale yeo e tlogetšwego goba e nyakilwego e tlogelwa gape ye e hwelelago ya Pilgrims’ Rest e fetošitšwe go ba khomodithi ya go dira tšhelete ya tša boeti ka go tsošološa meago ye mengwe, go kaonafatša ditlabekelo tša go amogela baeng, go tsošološa mafelo a go nyaka gauta ka go diriša pane ao a lego gona goba tša kgale moo baeti ba kago iteka go ka hwetša gauta, go thuša barakgwebo go hloma dikgwebo tša dikgabo le bobetli, go hloma ditsejana tša maoto tša go sepela nageng, gomme ka kakaretšo ba tsebagatša toropo bjalo ka lefelo le le goketšago la boeti. Selo se se swanago kudu le seo se dirilwe tabeng ya lefelo la lefase la bohwa la Cradle of Humankind (bona “matlafatšano”). Ditiragalo tša setšo bjalo ka Festibale ya Grahamstown, Festibale ya Bokgabo ya Bosetšhaba ya Klein Karoo, Kultuvaria kua Paarl le festibale ya mmino wa pop wa Oppikoppie le tšona di ka bonwa bjalo ka tša khomodithi, eupša ditiragalo di aba mehuta ka moka ya borabokgabo, ditšhaba tša selegae le tšona di ka iterela tšhelete ye botse go tšwa go abeng mafelo a go dula, le/goba go rekišetša mašabašaba a baeti dijo. Ditiragalo tše gape di abela barekiši ba dilo tša bokgabo le tša bobetli monyetla wa ditirišano tše dibotse tša kgwebo; batšweledi ba dilo tša setšo bjalo ka go rokelela dipheta le dilo tše di betlilwego ka kota le bona ba humana lefelo la go ka rekiša di tšweletšwa tša bona ditiragalong tše. Ka kakaretšo, ditiragalo tše tša leago le setšo e ba monyetla go batho go ka kgona go iphediša, ntle le gore mmušo o tsenye letsogo. Go tšwa go pono ya ekonomi le ya leago le setšo, menyetla ye ya khomodithi (ditiragalo) e tloga e nyakega kudu bjalo ka ge e le ditšweletšo tša maemong a selegae, tša maitirelo tšeo gantši di kago tšwetšwa pele go e na le merero ya nakwana ye e tsamaišago ke mmušo.
