Help
boingwadišo — Sesotho sa Leboa
Sebopego se sengwe sa temogo ya semmušo seo se hlatsetšago nnete ya gore lefelo la boeti, lefelo, tikologo goba naga e fihlelela dinyakwa tše di itšego goba sehlpha se se itšego sa ditekanyetšo. Mekgatlo ya boditšhabatšhaba bjalo ka Etšentshi ya Kopano ya Ditšhaba ya Thuto, Mahlale le Setšo (UNESCO) goba mekgatlo ya boditšhabatšhaba bjalo ka Kopano ya Ramsar(bona “ditumelelano”) o ka fa lefelo (e ka ba lefelo, naga goba tikologo) maemo a semmušo ge le fihlelela maemo a a rilego. Boingwadišo bja boditšhabatšhaba bo oketša kudu kgonagalo ya boeti ya lefelo le tikologo ya kgauswi. Bohlokwa bja mašaledi a akhiolotši ka mphomeng bjalo ka lefelo la lefase la bohwa la Cradle of Humankind, go akaretšwa Zwartkrans, Sterkfontein le mephoma ya Kromdraai, di fihlelela ditekanyetšo ka moka tša UNESCO ka go tsebagatša tikologo bjalo ka lefelo le bohlokwa la boditšhabatšhaba. Lefelo le le filwe ka mo go lebanego maemo a lefase a bohwa. Afrika Borwa e na le mafelo a mangwe a lefase a bohwa, bjalo ka Vredefort Dome (thotobolo ya khuetšo ye e hlotšwego ke meteoraete ge o thulana le Lefase dimilione tša mengwaga ya go feta) le Mmoto wa Mapungubwe, lefelo la akhiolotši la kgale le le lego karolong ya lebowa ya Limpopo. Boingwadišo bja go swana le bjo bo hlaloša dinyakwa tše di itšego tša taolo. Ge mekgwa ya taolo e wela boemong bjo bo lego ka tlase ga boemo bjo bo nyakegago, boingwadišo bo ka fedišwa. Ditiro tša go feta tša moepo kgauswi le lefelo la bja bohwa bja lefase la Mapungubwe bo tšhošeditše bobotegi bja lefelo le maemo a boingwadišo a boditšhabatšhaba. Mmušo wa Afrika Borwa o ile wa tsenelela go laola ditiro tša moepo go ka šireletša boingwadišo bja boditšhabatšhaba bja Mapungubwe. Go na le maingwadišo a mmalwa go tšwa go mekgatlo ya go fapanafapana ye e tsebegago, eupša maingwadišo a UNESCO le Ramsar (bona “mafelo a a thapilego”) ke tše di tsebegago kudu. Boingwadišo bja boditšhabatšhaba bjo bo sa tsebegego kudu ke boingwadišo bja Blue Flag bjo bo fiwago mawatle ao a nago le dika tše di hlokegago, meago, ditirelo tša polokego le mafelo a boitapološo ao a kgethilwego. Mawatle a mantši a Afrika Borwa a šetše a filwe maemo a, go fa mohlala Lewatle la Marina kua KwaZulu-Natal. Boingwadišo bja boditšhabatšhaba go tšwa mokgatlong ofe goba ofe wo o hlomphegago bo bohlokwa kudu go lefelo lefe goba lefe la bohlokwa bja tlhago goba setšo. Ge go nyakega, maiteko ka moka a taolo a swanetše go tsepamišetšwa go bolokeng maemo a boditšhabatšhaba.
