Help
toropofatšo — Sesotho sa Leboa
Tshepetšo moo karolo ye e oketšegago ya setšhaba ka moka sa naga se dulago ditoropongkgolo goba ditorotswaneng tše kgolo. Le ge e le gore batho ka dinako ka moka ka tlase ga maemo a a itšego ba ile ba huduga go yo dula kgauswi le baagišani le balelapa, ke fela 3% ya setšhaba sa lefase seo se bego se dula mafelong a toropo ka 1800. Ka 2000, batho ba go nyaka go balelwa go 50% lefaseng ba ile ba dula ditoropong, gomme phesente ye e profetilwe gore e tla golela go 60% ka 2025. Dinageng tše di hlabologilego (bona “dinaga tše di hlabologilego”) e ka ba 50% ya setšhaba ye e ilego ya ya go dula ditoropong go tloga ka bo-1950, eupša e sa le go tloga ka nako yeo phesente ye e gotše ka pela le ga ešita dinageng tše di hlabologago (bona “dinaga tše di hlabologago”) se e ka bago seripagare sa setšhaba se dula ditoropong. Mengwaga ye sekete ya go feta, tšhireletšo mohlomongwe e be e le lona lebaka le bohlokwa la go hudugela go ye tee ya ditoropo tšeo di bego di ageleditšwe ka maboto gomme di aba tšhireletšo kgahlanong le go šwahlela ga manaba le makoko a bahlakodi. Go tloga nakong yeo mabaka a ekonomi e bile lebaka le bohlokwa la go dula toropong. Tlhabollo ya moepo le intasteri le tšweletšo di hlodile mešomo gomme batho ba tloga nageng go yo šoma ditoropong moo mešomo ye e patelago gabotse e ka hwetšwago gona. Mmogo le toropofatšo e bile kgolo ya ditoropo tše kgolo. Bjale ka ge kgolo e baka kabo ya ditirelo, dinamelwa, madulo, bosenyi le mathata ka moka a mangwe ditoropong, dinaga magaeng di itemogela mathata ka lebaka la setšhaba se se fokotšegago. Bjale ka ge setšhaba sa dinaga magaeng e le se se nnyane, kabo ya ditirelo ga e be ya ekonomi gomme batho ba swanela ke go ya ditoropong go hwetša ditirelo tša kalafo, tša thuto, tša profešene, tša kgwebo le ditirelo tše dingwe. Ka batho ba mmalwa kudu bao ba šomago lefase, go ba le tšweletšo ya tlase ya dijo dinageng tše di hlabologago. Dinageng tše di hlabologilego tša intasteri, tšweletšo ya temo ga e fokotšege ka gobane didirišwa di tšeela legato bašomi ba dipolase. Toropofatšo e baka mathata a go fapanafapana go bobedi mafelo a ditoropo le a magaeng, eupša ao ke mathata ao lefase ga bjale le lebanego le ona ka gobane ditoropo tše kgolo le mafelo a toropong ao a fokotšegilego di šetše di le setlwaedi.
