Help
methopo ya boeti — Sesotho sa Leboa
Mafelo a tlhago le a go dirwa ke batho, mafelo, mafelo a mabotse, ditlabakelo, ditirelo, dipontšho, ditiragalo goba selo sefe goba sefe se sengwe seo se ka tanyago šedi ya baeti. E ka fapana le mafelo a pabalelo bjalo ka Lešoka la Bosetšhaba la Kruger, go ya go mafelo a boikgopolelo bjalo ka Disneyland, go ya go ditiragalo tša dikhonsate tša mmino wa pop bjalo ka Oppikoppi le meletlo bjalo ka Woodstock, go ya go mafelo a bohwa bjalo ka lefelo la bohwa la lefase la Motheo wa Tlhabologo. Dilo ka moka tše di boletšwego ke ditebo tša baeti (bona “tebo”), eupša baeti ba nyaka ditirelo, bjalo ka marobalo, dijo, dinamelwa, tshedimošo, tlhahlo, le kamogelabaeng yeo e abelago batho ba bangwe menyetla go dira tšhelete go tšwa go baeti bao ba etetšego ditebo. Batho ba ba abago ditlhoko tša baeti le bona ke methopo ya boeti, le ge e le methopo ya mohuta wa batho. Bjalo ka ge baeti ba go tšwa ntle ba kgahlwa ke metsesetoropo ya Afrika Borwa bjalo ka Soweto le Gugulethu, metsesetoropo ye e šetše e le ditebo tša baeti, gomme batho goba dikhampani di aba maeto a go ya metsesetoropong gape le batho bao ba nago le mabenkele a go jela le marobalo ao a abago difihlolo metsesetoropong gape le ditlabakelo le ditirelo tše ba di abago, gape ke methopo ya boeti. Baeti ka bobona ba ka bonwa bjalo ka mothopo. (Bona “tebo”, “bokgoni bja go rwala”, “pabalelo” “tlhabollo ye e swarelelago”, “marobalo a baeti” le “kgwebo ya tikologo”.)
