Help
diabe tša leago le setšo — Sesotho sa Leboa
Batho ba dula dihlopheng tša leago tše di rulagantšwego go ya ka haerakhi, go ya le ka ditlwaedi le ditšo tša bona. Ditšo, ditirelo, ditlwaetšo tša bodumedi, dikamano tša leago, le tše dingwe, di bontšha melao ya bona ya go phela le ka tsela ye ba bonago lefase. Ge go se tsepame ga dipolitiki go ka hlola ntwa, setšhaba se ka aroganywa goba go ka gapeletšwa go tlogela bodulo bja bona le mafelo ka moka ao ba a tšeago gore a kgethegile, go gapeletšwa go ithuta polelo e šele, goba go tsenelwa ke bontši bja bahudugi goba bafaladi go tšwa lefelong le lengwe bao ka pelapela ba fihlago go tlo dula lefelong la bona (bona “mofaladi” le “setšhaba sa mong”). Go tla ba le seabe se segolo bophelong bja leago le setšo sa setšhaba sa setlogo. Gomme ba tla be ba lebeletšane le ditlwaedi tše šele, ditlwaetšo tša bodumedi, ditlwaetšo tša leago le setšo, gomme mafelelong kgomarelo ya setšo se šele goba ešita le kgomarelo ya mekgwa ya boitshwaro ye šele e ka direga (bona “kgomarelo ya setšo se šele”). Dipoelo tša diabe tše ke go nyalelana le batho ba ga bjale re ka se rego ke batšwantle gomme mafelelong setšhaba sa setlogo se ka lahlegelwa ke ditlwaetšo, bodulo le boitsebišo bja bona. Taolo ya ditšo tše di itšego e ka fediša ditšo tše dingwe ka kgapeletšo goba ka khutšo. Ge batho ba kgahlwa kudu ke tsela ye nngwe ya bophelo, ba ka kgetha go e kgomarela le go lahla ya bona. Setšhaba sa Amerika ke mohlala wa go kgahliša. Ge MaAfrika-MaAmerika ba be ba tlišwa kua Lebowa la Amerika bjalo ka makgoba, ba be ba arogantšwe le ditlwaetšo tša bona tša leago le setšo le go gapeletšwa go kgomarela ditlwaetšo tša beng-makgoba. Makgoba a Afrika e be e le batho ba ba šarankantšwego ka mo go feletšego. Le ge go le bjalo, nakong ya mengwaga ye makgolo a mabedi le ditiragalo tše šiišago, batho ba go fapanafapana ba kua USA ba kopane go ba setšhaba se tee seo – ka kakaretšo – se nago le ditšo tša leago le setšo tša go swana. Batho ka moka ba go fapanafapana ba lefase ba itemogetše diabe tša leago le setšo nakong ye nngwe goba ye e rilego, ba ile ba huetšana gagolo goba ganyane. Eupša MaYuropa, MaChina, MaIndia, MaBrazil, le ba bangwe, ba sa na le ditšo tša leago tše di fapanego le tša ba bangwe. Seabe sa leago le setšo sa inthanete se šetše se bile bohlokwa gomme seabe sa sona sa bokamoso se tla ba se se kgahlišago go se ela šedi.
