Help
go skoupa — Sesotho sa Leboa
Tshepetšo ya go laetša seabe. Tshepetšo ye e latela tshepetšo ya go šira (bona “go šira”) gomme e akaretša taetšo ya diabe tše di swanetšego go akaretšwa tekolong ya seabe le gore ke diabe dife tše di hlokago go akaretšwa. Protšeke ye e šišintšwego ya tlhabollo – go feleleng ga yona – e ka tliša seabe se bohlokwa go tikologo, eupša makala ka moka goba dikgato tše di akaretšwago protšekeng di ka no se be le diabe tše šoro tša go swana. Diabe ka moka tše di ka bago le kotsi di swanetše go nyakišišwa ka mo go feletšego nakong ya kgato ya tekolo ya protšeke, eupša e tla be e le go senya tšhelete le nako go ka nyakišiša diabe tše di ka se bego le kotsi gape di se tše bohlokwa. Morero wa go skoupa ke go laetša gore ke diabe dife tše di swanetšego go nyakišišwa le tše di sa swanelwago go nyakišišwa. Go skoupa go swanetše go laetša ditaba tše bohlokwa tšeo seabe sa tekolo se swanetšego go tsepelela go tšona. Ela hloko gore diabe ka moka tše di kgonegago di tšeelwa hlogong tshepetšong ya go skoupa, eupša tše di sego kotsi di a ntšhwa ge dinyakišišo di tšwela pele. Go na le mekgwa ya go fapanafapana ye e kago šomišwa go laetša kgonagalo ya diabe tše šoro. Tshepetšo ya go skoupa e tšweletša tokumente ye bohlokwa, e lego morero le sebopego (ToR) tša kgato ya tekolo ya tikologo. ToR e bopa “ditaelo” tša seabe sa kgato ya tekolo ya tikologo. ToR ya go fokola goba ye e sa felelago e ka tliša dinyakišišo tše di sa lekanago tša ditaba tše bohlokwa tšeo mafelelong di kago tliša kgobalo ye šoro, ya go tura goba ye e ka se bušetšwego morago go tikologo. Boratikologo ba bantši le ditsebi ba bona go skoupa bjalo ka kgato ye bohlokwa kudu ya tshepedišo ya taolo ya tikologo ka moka ye e kopantšwego. Go skoupa ke tshepetšo ya go raragana, eupša go na le ditokumente tše ntši tša tlhahlo tša ka fao go skoupa go kago goba go swanetšego go dirwa ka gona. Go bohlokwa gore bakgathatema ka moka ba swanetše go akaretšwa le gore tshepetšo e swanetše go rulaganywa gabotse le go laolwa gabotse.
