Help
tirišoleswa — Sesotho sa Leboa
Tirišo leboelela ya materiale, eupša e sego ka sebopego sa wona sa tlhago. Re ka se tšhabele melao ya tlhago ya pabalelo ya mmase le maatla tše di laetšago gore “ga gona tsela” (bona “tšhumo”), dilo dife goba dife tše re di tšweletšago goba go di dira di tla be di sa le gona ka sebopego se se itšego goba se sengwe morago ga ge re se sa di šomiša. (Bona “tlhabollo”, “ekonomi ya mohlakanelwa”, “dinaga tše di hlabologago” le “dinaga tše di fetogago”, “ditiro tša ekonomi tša sekontari” le “ditiro tša thešiare”.) Go feta moo, go ka tšweletša dilo, re šomiša methopo ye e sa mpshafatšwego gomme mafelelong, methopo ya rena ye e hlaelago, ye e ka se mpshafatšwego e “tantšwe” go dilo tše re ka se di šomišego, mola methopo ya rena e fela. Se go molaleng gore ke boemo bjo bo ka dirago gore bobedi re lahlegelwe. Tharollo ye e kwagalago e ka ba go fokotša, go diriša leboelela le go dirišwa leswa. Tirišo leswa e akaretša bobedi phokotšo, bjalo ka ge dilo tša palo ya tlase di swanetšwe go tšweletšwa, le tirišo leswa bjalo ka ge dilo ka botšona di dirišwa leboelela, goba bonyenyane bja materiale wo di dirilwego ka wona o šomišwa leboelela go dira selo se sengwe. Tlhago ya tumelo ya go reka le go šomiša dithoto tše ntši e ya fokotšega methopong ya rena ye e sa mpshafatšwego gomme e tladitše lefase la rena ka dilo tše re sa di nyakego. Go fetošetša go tlhago ye e fapaneng go ka se direge go moloko o tee, eupša ge ka moka re ka šoma mmogo re ka go fihlelela pele selemo e e ba ngwagola. Go na le dibopego tše di kgahlišago, tša mekgwa e meswa tša tirišo leswa dikarolong tša go fapanafapana tša lefase, gomme go bohlokwa go lemoga gore go senya ka ntle le lebaka go kotsi kudu lefaseng le le hlabologilego go feta dinageng tše di hlabologago. Maiteko a a retegago a tirišo leswa ke a protšeke ya Collect-a-Can (yeo mošomo wa yona e lego go kgoboketša ditšhitswana), le diprotšeke tša tirišo leswa ya maphephe tša Mondi le Nampak ka Afrika Borwa. Go na le batho bao ba iphedišago ka go kgoboketša ditšhitswana tše di dirišitšwego le go lefelwa go ya le ka boima bja ditšhitswana tše ba di kgobokeditšego tšeo di šomišwago go dira ditšhitswana tše mpsha. Nampak e kgoboketša maphephe ao a šomišitšwego go tšwa dikhamphaning tše di šomišago maphephe a mantši bjalo ka Unisa, gomme Unisa e ya lefelwa ka maphephe a yona a e a lahlago. Mondi e abela batho ba praebete diteroli go kgoboketša mapokisi le maphephe a a lahlilwego le go lefela bakgoboketši tšhila ye ba e tlišago. Tirišoleswa ya galase e atlegile kudu kua Yuropa le Canada, eupša ka Afrika Borwa go fihla ga bjale e na le katlego ye e lekaneditšwego. Ka lebaka la setšhaba se se ntši sa Afrika Borwa se se diilago, dilo tše ntši tše di lahlilwego di kgoboketšwa go tšwa bolahlatšhila gomme di feleletše e le materiale wa go aga mekutwana (mekhukhu) mafelong a go dula ao a sego molaong. Ka tsela ye, tirišo leswa ka phošo ga e fihlelelege.
