Help
go kgatha tema ga setšhaba — Sesotho sa Leboa
Kakaretšo ya setšhaba go direng diphetho mabapi le tlhabollo ye e akantšwego goba protšeke ye e ka bago le seabe se bohlokwa go tikologo. Tshepedišo ya taolo ya tikologo ye e kopantšwego (IEM) e dumelela setšhaba go kgatha tema tšeong ya diphetho, gomme molao wa Afrika Borwa wa tikologo (bona “taolo ya tikologo”) o dira go kgatha tema ga setšhaba senyakwa se bohlokwa go tumelelo ya go ka hlabolla protšeke. Gomme, mekgatlo ka moka ye e nago le kgahlego gape ye e amegago (di-IAP) e swanetše go tsebišwa pele go ka tšwelwa pele go hlabolla protšeke. Ka molao, moakanyi wa protšeke o swanetše go tsebiša batho ba lefelo le setšhaba ka kakaretšo mabapi le tšhišinyo, gomme a fihlelele ka moka di-IAP, a ba hlalošetše dintlha tša protšeke, le go ela hloko maikutlo a bona go tšhišinyo ye mafelelong e neelwago balaodi go ka humana tumelelo ya go ka tšwela pele. Bontši bja diprotšeke tše di šišintšwego ka Afrika Borwa di gannwe goba go fetošwa ka gobane ga sa nke go rerišanwe le setšhaba goba go se tsebiša ka mo go kgotsofatšago. Gabotsebotse, ye ke e nngwe ya makala a a šomago sestemong ya taolo ya tikologo ka Afrika Borwa.
