Help
mafelo a a šireleditšwego — Sesotho sa Leboa
Lefelo lefe goba lefe la dinagamagaeng goba dinagaditoropong leo le lokelwago ke go šireletšwa le/goba go bolokwa gore meloko ya ka moso e tle e holege. Le akaretša mafelo a diphedi tša lešoka le mafelo ao go dulago diphoofolo, diphororo tše botse, mabopo a go kgahliša, menabo ye meteleletelele ya maganata, dikarolo tša histori tša ditoropo, bokagare bja ditoropo tša kgale, dilo tša go dira ke batho le ditikologo tša tšona tša kgauswi, le tše dingwe. Dimusiamo di aba tšhireletšo go dilo tše nnyane, eupša mafelo a magolo a tlhago le dilo tša go dirwa ke batho bjalo ka Taj Mahal kua Aggra (India), diphiramiti kua Egypt, Lešoka la Bosetšhaba la Kruger, le Lefelo la Bohwa la Lefase la Motheo wa Tlhabologo le diphororo tša Iguassú di ka se tswalelelwe dimusiamong! Le ge go le bjalo, go lokela ke tšhireletšo ga mafelo le dilo tše go bile molaleng mengwagangwaga goba le ešita le mengwagakgolo, gomme maiteko a go di šireletša a thomile mengwaga ye mentši ya go feta. Kgale pele ga ge taolo ya tikologo ya mehleng yeno e ka akanywa, mafelo a le dilo tše tša go ikgetha, tše bohlokwa gape tše di ka se tšeelwego legato di be di šetše di šireleditšwe ke ditumelelano tša go fapanafapana tša boditšhabatšhaba tša tšhoganetšo, melao ya bosetšhaba, melao ya selete le/goba ya masepala le ditlabakelo tše dingwe tše ntši tša semolao tšeo di diretšwego go netefatša tšhireletšo ya tšona. Le ge mekgwa ya bjale ya taolo ya tikologo le molao di aba tšhireletšo ya mafelo a a go ikgetha, di sa fiwa šedi ya go ikgetha gomme melao ye mentši ya kgale ye e beilwego ya taolo ya pele ya tikologo e sa šomišwa ga bjale. Mabakeng a mantši, dithulaganyo tša tšhireletšo ya go ikgetha ya boemo bjo bo itšego bja mafelo goba dilo di tla pele ga molao wa go tlwaelega wa tikologo. Antaktika ke mohlala tabeng ye. Molao wa go tlwaelega wa tikologo ga o šomišiwe go Antaktika, e šireletšwa ke Tumelelano ya Boditšhabatšhaba ya Antaktika, mokgatlo wa boditšhabatšhaba ka tlase ga tšhireletšo gomme go merero ka moka ya tirišo ke wona mokgatlo wo mogolo wo o tšeago diphetho mabapi le Antaktika. Go tšwa go mehlala ye mmalwa ye e boletšwego ka godimo, go molaleng gore bontši bja mafelo le dilo tše di swanetšego go šireletšwa di fapana kudu ka bogolo le tlhago. Ešita le ka gare ga lefelo le tee le le šireleditšwego bjalo ka Lefelo la Bohwa la Lefase la Motheo wa Tlhabologo, dikarolo tše di itšego ga di a šereletšwa gabotse, mola tše dingwe di šireleditšwe kudu moo e lego gore baeti ga ba a dumelelwa go tšona. Mohuta wo wa tšhireletšo matšatšing a lehono o a šomišwa gore batho ba se dumelelwe go tsena ka dikarolong tše di itšego tša lefelo le le šireleditšwego, mola taolo ye e sa tiago e dirišwa go se se bitšwago lefelo le le šireleditšwego moo batho ba ka ipshinago ka dilo tše bohlokwa le mabotse a tlhago goba a go dirwa ke motho le mabotse a lefase la rena la go fapanafapana. (Ela hloko: Go bohlokwa go lemoga gore taolo ya tikologo e mabapi le mafelo a tlhago le a go dirwa ke batho le dilo.)
