Help
kgoketšo — Sesotho sa Leboa
Lefelo, ponogalo, pono, ponagalo ya naga, monyetla, tiro goba tiragalo yeo batho ba nyakago go e bona, go e boga, go kgatha tema go tšona goba go ba go tšona. Mo go Thutafase le taolo ya tikologo leina le le dirišwa gantši mabapi le dinamelwa, khudugo ya batho, boeti, ditiro tša ekonomi le kabo ya ditirelo. Mafelo a ka kgahliša ka lebaka la gore a aba menyetla ya mešomo (go fa mohlala, batho ba go tšwa Zimbabwe le Malawi bao ba nyakago mešomo ka Afrika Borwa), phihlelelo ya meletlo le ditiragalo tše bohlokwa tša sedumedi (go fa mohlala, leeto la ngwaga ka ngwaga la hajj go ya Mecca), mawatle a mabotse a gauta (bjalo ka Durban, Cape Town le Rio de Janeiro), diphororo tše botse (bjalo ka Iguassú Falls magareng ga Brazil le Argentina, le Victoria Falls magareng ga Zimbabwe le Zambia), goba go rutha le go bapala maphotong a magolo (bjalo ka Hawaii goba Lewatle la Bondi ka Australia). Dikgoketšo di hlola tshepelo ya batho gomme go tšwa go mehlala ye e boletšwego godimo, go swanetše go hlake gore bontši bja mesepelo yeo e direga go mellwane ya boditšhabatšhaba. Ditumelelano tša dipolitiki tše di kgontšhago tshepelo ye e sa šitišwego magareng ga dinaga tša go fapanafapana gore ba kgone go tla go bona lefelo la boeti go tšwa mahlakoreng ka moka kgale di le gona. Baeti ba mmalwa ba lemoga gore ba tshela mollwane wa Brazil le Argentina ge ba tšwile ka leeto la go yo bona diphororo tša Iguassú. Sebopego se seswa gape seo se golago ka lebelo sa tshepelo ya go tshela mollwane se hlodilwe ka tlhabollo ya mellwane ya go tsenelana ya bophelo bja lešoka goba mafelo a tlhago. Afrika Borwa e šetše e abagana mellwane ya tsenelano le Mozambique, Zimbabwe, Botswana, Namibia le Lesotho. Diphakeng le mafelong le dirapeng tša diphoofolo mellwane e tlošitšwe gomme mosepedi ga a tšee gore o tsene nageng ye nngwe ye a fapanego. Tshepelo ye e sa šitišwego ya dihlopha tša baeti mellwaneng ya mmušo go bona dika tše botse tša tlhago e tlošitšwe ke ditherišano tša sepolitiki tše di tšwago ditumelelanong tša boditšhabatšhaba, eupša mongwe o swanetše go gopola gore go na le setho sa politiki sa go fapana le tše dingwe se se lego gona ditlhabollong tša tikologo tša tsenelano ya mellwane (bona “motšwasehlabelo”).
