Help
fihlelelega — Sesotho sa Leboa
Bonolo bjo ka bjona selo goba lefelo le ka go fihlelelwa, go hwetšwa goba go tsenwa. Mabaka a mmalwa a ka dira gore lefelo le le itšego e be le le fihlelelwago gabonolo goba go fihlelelwa gannyane. Tše di akaretša bokgole, boemo (bogodimo godimo ga boemo bja lewatle), mabaka a politiki, dipeakanyo tša polokego, dikiletšo tša setšo, le tše dingwe tše ntši. New York e fihlelelega bonolo go e na le ngwedi ka gobane leeto ka sekepe, koloi, setimela, pese goba sefofane go ya New York le phela le le gona semeetseng gape le ditshenyagalelo di tlase kudu go e na le sefofane sa go ya ngweding. Ntlhora ya Thaba ya Tafola kua Cape Town e fihlelelwa gabonolo go e na le ntlhora ya Thaba ya Everest ka gobane boemo bja Everest bo na le moya wa go hlweka o monnyane go ka phediša motho. Motho yo mongwe le yo mongwe yo e ka bago yo monnyane gape a phetše gabotse mmeleng a ka sepela go yo fihla ntlhoreng ya Thaba ya Tafola – le ge e le mosepelo wo mothata! – eupša go fihla ntlhoreng ya Everest, motho o hloka “lepotlelo” la moya wa go hlweka go tšwa go mapotlelo a moya wa go hlweka ao a swanetšego go rwalwa mmeleng go rotoga thaba (bona “boeti bja teko” le “boeti bja boikarabelo”). Batho ba ba šomišago ditulo tša bagolofadi ba ka hwetša go sa kgonagale go tsena meagong ye e rilego, moo go dirago meago yeo gore e se fihlelelege go bona. Ka mabaka a politiki, ga go na mosepelo wo bonolo wa batho gare ga Korea ya Borwa le ya Leboa, le ge dinaga tše di le kgauswi le kgauswi. Ka lebaka leo, Korea ya Leboa e fihlelelega gabonolo go Makorea a Borwa. Ka mabaka a polokego go boima goba go se kgonagale go tsena ka gare ga Meago ya Pušo kua Pretoria (setulo sa mmušo), eupša meago ya Unisa khamphaseng ya Pretoria e ka tsenwa ke leloko lefe goba lefe la setšhaba. Go fihlelelega ga tshedimošo ke mohlala wo mongwe wo mobotse. Go bonolo go humana tshedimošo ka dipapadi tša kgwele ya maoto tše di bapetšego ka Afrika Borwa bekeng ye nngwe le ye nngwe ye e itšego, eupša tshedimošo mabapi le bokgoni bja nyuklea ya USA ga e fihlelelege (go boima goba go se kgonagale go e fihlelela).
