Help
mmotlolo wa mpshafatšo — Sesotho sa Leboa
Sete ya diteori tša ekonomi tše di laetšago dipoelo tša tlhabollo ya theknolotši tlhabollong ya ekonomi, koketšego ya go phela gabotse mmeleng, ditekanyo tša godimo tša go kgona go ngwala le go bala le maemo a thuto, le kgolo ya tlase ya setšhaba le khwalithi ye e oketšegilego ya bophelo. Mmotlolo wo o šišinya gore tšhomišo ya metšhene ya diintasteri tša temo le intasteri, matlafatšo ya mafapha a sekontari a gabotse le a go latela a ekonomi (ka mokgwa wa ditlhohleletšo tša tšhelete), go ba gona ga ditirelo tša maphelo tše kaone, boemo bjo bo oketšegilego bja thuto, koketšego ya lehumo la ditšhelete la motho ka o tee ka o tee wa setšhaba le phokotšego ye kgolo ya setšhaba ka moka di a amana go neteweke ya dipapišo tše dibotse gomme go bile le nako ye e lekanego go ka leka ditšhišinyo. Ke lereo le le bilego gona mengwaga ye 50 ya go feta, go bile le nako ye e lekanego ya go ka leka ditšhišinyo tše di thekgago diteori tše di hlomago mmotlolo. Le ge go le bjalo, ga gona bohlatse bjo bo kgodišago bjo bo hweditšwego. Dinageng tše dingwe, dipapišo tše dibotse di gatišitšwe, gomme go tše dingwe ga di a gatišwa. Dinageng tše ntši tša Afrika, ga gona se se diregilego go thekga diteori. Go dinaga tše di bitšwago tša BRICS (Brazil, Russia, India, China le Afrika Borwa) (bona “tlhabollo ya ekonomi”) tše dingwe tša dipapišo tše dibotse di hweditšwe, eupša gagolo dikarolong tša naga gomme e se nageng ka moka. Go na le maemo a moswananoši a mantši a gore mmotlolo o ile wa se amogelwe bjalo ka kgonthe ya lefase. Go bolela thulano ye tee go diteori tša mmotlolo, go ka ithuta ka tiragalo ya USA. Mpshafatšo ya USA le tlhabollo ya ekonomi di latela bontši bja melao ya mpshafatšo ya mmotlolo, eupša tlhabollo ya yona ya ekonomi e tlišitše kgolo ya ka pela ye e bego e sa letelwa ya setšhaba ka lebaka la phalalelo ya batho. Thulano ye nngwe ke gore dinageng tše ntši tša Afrika ditekanyo tša pelego le ditekanyo tša kgolo ya setšhaba di bile godimo le ga e le gore go bile le tlhabollo ye e okotšegilego ya ekonomi le kabo ye kaone ya ditirelo tša tlhokomelo ya tša maphelo. Mmotlolo wa pshafatšo o bohlokwa ka gobane o aba mahlamo a kgopolo ya thutamahlale (ke go re, mmotlolo) eupša ga se diprofeto ka moka tše di dirilwego mabapi le mmotlolo tše di šetšego di kgonthišitšwe go ba tša nnete. (Bona “tlhabollo ya ekonomi”, “tšhupane ya tlhabollo ya setšhaba”, “kgolo ya ekonomi”, “tlhabollo”, “dinaga tše di hlabologilego” le “dinaga tše di hlabologago”.)
