Help
phokotšego ya makenete — Sesotho sa Leboa
Bokgole bja khutlo magareng ga phoulu ya leboa ya lefelo le phoulu ya leboa ya makenete ya Lefase. Phoulu ya leboa ya makenete e sepelago tikologo ye nnyane bogodimong bja Lefase tshepetšong ye e bitšwago “go ralala phoulung”, mola phoulu ya leboa ya lefelo e phela e le boemong bjo tee bja go se fetoge. Nalete ya khamphase ka dinako ka moka e tla phela e šupile go phoulu ya leboa ya makenete, go se go ya lefelo. Gomme, pering yeo e tšerwego ka mokgwa wa khamphase e swanetše go “lokišwa” go ka tseba moo go lego leboa la nnete. Go ka kgona go dira tokišo, motho o swanetše a tsebe se phokotšego ya makenete e lego sona (bona “pering”). Go raraganya dilo, go ralala le phoulu ke tshepetšo ya lebelo gomme phoulu ya makenete mafelelong e a šutha boemong bja yona. Go raraganya ditaba le go feta, phokotšego ya makenete e ya fapana go tšwa go lefelo go ya go le lengwe ka gobane taetšo ya go ya go phoulu ya makenete bjalo ka ge e etšwe lefelong le tee bogodimong bja Lefase e tla fapana le ye e etšwego go tšwa lefelong le lengwe. Ka mahlatse, mebepe ka moka ya semmušo ye e gatišitšwego (bjalo ka melokoloko ya mebepe ya topokhatastrale ya 1:50 000 ya Afrika Borwa e bontšha tshwantšho ye nnyane methalading ya yona go laetša phokotšego go tšwa tikologong nakong ya kgatišo ya mmepe. Ka tshedimošo ye, go bonolo kudu go ka hwetša moo -leboa la nnete le lego gona (bona “pering”), eupša ka ntle le tshedimošo ye, re ile ra se kgone go hwetša gabotse moo leboa la nnete le lego gona. Ditlabakelo tša sebjalebjale tša go nyakišiša lefelo (bjalo ka diGPS) di aba tshedimošo ye, eupša ge o lahlegile go gongwe lefelong le le itšego o šomiša khamphase bjalo ka thulusi e le noši ya go nyakišiša lefelo, o tla kgona fela go hwetša taetšo ya kakaretšo ya leboa, eupša e se ya maleba.
