Help
setšhaba sa monggae — Sesotho sa Leboa
Kgobokanyo ya kamano ya batho goba ya dilo tšeo di dulago lefelong le tee gomme gateetee goba ka go nanya di swanetšego go katana le tšhologelo ya batho goba dilo lefelong le bapilego le goba la kgauswi. Setšhaba se seswa seo se šwahlelago se kaba se tšhabile, se rakilwe, goba go diragetše gore se feleletše se le lefelong leo go dulago setšhaba sa monggae. Go ekosestemo ya tlhago yeo e sego ya batho (bona “ekosestemo”), bašwahledi ba ka hwa goba go ja/bolaya batho ba bangwe ba tikologo gomme ba ba mohuta wo maatla wa ekosestemo ka moka. Ge ba ka se itlwaetše maemo le dilo tše di dulago tikologong, ba tla hwa goba ba huduga. Ditšhabeng tša batho, “bašwahledi” e ka ba batho bao ba tšhabago go hwa, ba se na mangwalo a boitsebišo goba tšhelete le go fokola goba go se be le dikgokagano go batho ba lefelo leo ba tšhabetšego go lona (bona “mofaladi”). Setšhaba sa monggae se ka swara makgwakgwa batho bao ba sa tšwago go fihla le go ba raka goba go ba bolaya, eupša seo ga se direge gantši ka gobane batho ba ke se tšhabele lefelong leo ba tsebago gore ba ka se amogelwe. Gape go na le mekgatlo ya boditšhabatšhaba bjalo ka International Red Cross, Médecins Sans Frontièrs, Oxfam le United Nations High Commission for Refugees (UNHCR) yeo e ka thušago bobedi bafaladi le setšhaba sa monggae go ka katana le maemo. Eupša go ka se phegišwe gore batho ba lefelo ba lebane le bothata ge ba swanetše go amogela “batšwantle”. Le ge e le gore batšwantle ga se bafaladi go ya nneteng ya lentšu, mathata a ka ba gona ge batšwantle ba šomiša ditirelo, ba hloka tlhokomelo ya maphelo le ya thuto, ba humana mešomo, gomme ba se ke ba ba karolo ya setšhaba ka mo go feletšego. MaAfrika Borwa gabjale ke setšhaba sa monggae go diketekete (le ga ešita dimilione) tša batho ba go tšwa Zimbabwe, Mozambique, Angola, Nigeria, Ghana, Malawi, Democratic Republic of the Congo, Somalia le batho ba go tšwa dinageng tše dingwe tša Afrika. Palo ya ditlhaselo tša bafaladi e diragetše gomme Maafrika Borwa a mantši ga a thabišwe ke go ba gona ga batšwantle ba, eupša go fihla gabjale Maafrika Borwa a itaeditše gore ke setšhaba sa gae sa go ba le kgotlelelo.
