Help
polokego ya dijo — Sesotho sa Leboa
Kgonthišetšo ya gore go tla phela go na le dijo tše di lekanego tša mang le mang lefaseng. Mengwaga ye 200 ya go feta, Thomas Malthus o porofetile gore setšhaba sa lefase se tla felelwa ke dijo e se kgale (nakong yeo). Eupša, mengwaga ye e ka bago ye 200 re ile ra kgona go tšweletša dijo tše ntšintši tša batho ka moka. Ditheknolotši tše mpsha, mehuta ye mekaone ya go bjala dibjalo, nošetšo ya go fetoša mafelo a a bego a sa tšweletše go ba mafelo a dibjalo, le dipholisi tša go lefela temo ya kgwebo di bakile koketšego ye kgolo ya dijo tša lefase tše di bego di tšweletšwa go tloga nakong ya se se bitšwago Puno e Kgolo ya bo1950. Ka bomadimabe, batho ba go feta bogare bja setšhaba sa lefase ga ba na dijo tše di lekanego goba ba bolaya ke tlala, eupša mabaka a seo ke a sepolitiki le ekonomi, e se tlhokego ya dijo. Gabjale re tšweletša dijo tše ntši tša go fepa monna, mosadi le ngwana yo mongwe le yo mongwe gantši le gantši, eupša kua Asia le kudukudu Afrika, batho ba dimilione ba boemong bja go bolaya ke tlala. Go na le thulano magareng ga tšweletšo le go ba gona ga dijo. Polokego ya dijo e šetše e le lefapha la thuto gomme Mokgatlo wa Ditšhabakopano o na le etšentshi go ka hlohleletša tšweletšo le kabo ya dijo, le ge e le gore e itemogela mathata a šoro go netefatša kabo ya dijo go ditšhaba tše ntši tše di bolayago ke tlala dinageng tše di itšego tša Afrika. Tlhohlo ya bokamoso ga se tšweletšo ya dijo tše di lekanego, eupša kabo ya dikabo tše di lego gona.
