Help
lewa — Sesotho sa Leboa
Seloupu se segolo se se fedišago mmoto goba bogodimo bjo bongwe le bjo bongwe bja molala goba morotoga. Mawa gantši ke dibopego tše botse kudu tša ponagalo ya naga. Mawa a mabotse a Drakensberg ka ge a bonwa go tšwa KwaZulu-Natal a hlaloša mollwane magareng ga Afrika Borwa le Lesotho gomme ke e tee ya mayo a baeti a bohlokwa a Afrika Borwa (bona “boyo”). Go tšwa lehlakoreng la Lesotho, le ge go le bjalo, ga a kgahliše – gabotsebotse ga a bonale! Go no ba bjalo go mafelo a merotoga ya godimo – mang le mang kua tlase o lebelela mawa ge a beela merotoga mellwane, eupša kua morotogeng ga go lewa le o kago le lebelela. Mo gongwe mawa a mabotse kudu ka Afrika Borwa ke mawa a Drakensberg ao a arolago tše di bitšwago Nagagodimo le Nagatlase. Mawa a makgwakgwa kua Mpumalanga le Limpopo gape a na le mayo a bohlokwa a baeti, kudukudu a baeti ba go tšwa dinageng dišele tseleng ya bona ya go ya Lešokeng la Bosetšhaba le Diphoofolo la Kruger (bona “monyetla wa go tsenelela”).
