Help
seabe sa tšhupetšo — Sesotho sa Leboa
Kamano ya tumelelano ya ditšo, ditlwaedi tša setšo, maphelelo, ditekanyetšo le ditlwaedi tša batho ba go fapanafapana go ditšhaba tše dingwe goba dihlopha tša batho. Ke lereo leo le amanago kudu le kgomarelo ya setšo se šele (bona “kgomarelo ya setšo se šele”), eupša gantši le akaretša dihlopha tše nnyane le kakaretšo ya tlase ya diphethene tša boitshwaro go e na le kgomarelo ya setšo se šele. Bjalo ka ge phetošetšo ya setšo se šele gantši e le tshepetšo ya tsela ye tee, seabe sa taetšo ke tshepetšo ya ditsela tše pedi (ke go re, tshepetšo ya tumelelano); se, le ge go le bjalo, ga se molao o boima gape wa ka pela. Bogona bja baeti goba bahlankedi sehlopheng sa batho ba ditlwaetšo tša setšo le ditšo tša go fapanafapana le disestemo tša ditekanyetšo di ka ama dihlopha bobedi ka gobane di ka thoma go kopišetšana. Boeti bo aba maemo a maleba a boitshwaro bjo bja go kopiša. E ka ba tiro ya go ithaopa ka mo go feletšego, eupša ge sehlopha se tee sa batho se bona ka fao dihlopha tše dingwe tša batho di phelago ka gona, se thoma go kopa ditlwaetšo tše di itšego tša batho bao. Baeti, basepedi le bašomedi ba botseta go tšwa dinageng tša bodikela ba ithutile go ja suši kua Bodikela bja Asia gomme ba itsebiša go bakgotse, baeng le bagwera ba bona dinageng tša gabobona. E ile ya tuma, gomme lehono ke letsaka le go ipshinwago ka lona Bodikela bja Europa, USA le ga ešita Afrika Borwa. Baeti ba ba ipshinnego ka go ja mašotša ge ba etetše Afrika Borwa, ba ka a tsebagatša bjalo ka letsaka dinageng tša gabobona. Se, ka nnete, se ka se fetoše setšo ka moka sa dinagamagaeng a baeti. Ka mo go swanago, go aparwa ga dipeketsana ke batho ba ba bonego baeti ba di apere go ka se bake kgomarelo ya setšo se šele. Seabe sa tšhupetšo gabotse ke go kopiša boitshwaro bja maitirelo bja setšo le leago, gomme e direga go ditlwaedi le ditlwaetšo tše di akaretšwago gannyane go feta ka mo kgomarelo ya setšo se šele e diregago ka gona. Ya morago e direga go maphelelo ka moka, ditšo, disestemo tša tumelo le dipono tša lefase, mola ya pele e direga go kopišeng diphethene tše bonolo tša boitshwaro, dijo, mekgwa e lego nakong le tiragalo ye tee. Mohlala wa go tlwaelega wa seabe sa tšhupetšo ke meletlo ya lenyalo ya Maafrika Borwa a bathobatso a mehleng yeno. Le ge ba sa lahla setšo sa bona ka mo go feletšego sa meetlo le meletlo ya bona ya setšo ya go nyala, ga bjale ba na le meletlo ya lenyalo ye mebedi ya go arogana, o tee o e lego moletlo wa semolao wa “lešira” wo o tsebegago e le moletlo wa lenyalo wa Maafrika Borwa a makgowa. Le ge go le bjalo, makgowa a Maafrika Borwa ga ba akaretša dikarolo dife goba dife tša ditlwaedi tša manyalo tša setšo tša Maafrika Borwa a bathobaso go meletlo ya bona ya manyalo.
