Help
papatšo ka phokotšo ya tirišo — Sesotho sa Leboa
Leano la bolaodi go ka lekanyetša le go laola palo ya baeti go mafelo a boeti ao a kago senywa gabonolo goba a sensithifi. Mafelo a a itšego a boeti, bjalo ka Disneyland le Sun City, a diretšwe go ba a maatla kudu gomme a ka emelana le mašabašaba a mantši a a sa felego a baeti. Go se swane le ona, mafelo a a itšego a boeti bjalo ka mephoma ya kalaka, mabitla a a lego ka tlase ga mobu, meepo ya letswai, mebotwana ya khorale, mafelo a tlhago, mafelo a diphoofolo, mafelo a sedumedi le mafelo a go naganišiša le a segopotšo a ka senywa gabonolo le/goba ga a lokela go emelana le mašabašaba a baeti ka dinako ka moka (bona “bokgoni bja go rwala”). Ke nnete, batho ba ka se botšwe go se etele lefelo la boeti, ka gobane baeti ba bohlokwa kudu katlegong ya lefelo lefe goba lefe la boeti. Le ge go le bjalo, ge lefelo le ka senywa ke baeti ba bantši, magato a taolo a swanetše go tšewa goba lefelo le tla senywa, gomme bolaodi ba tlo latofatšwa ka go “senya selo se se ba direlago tšhelete”. Go na le kgonono ye e kwagalago ya gore bokgoni bja go rwala bja Lešoka la Diphoofolo la Bosetšhaba la Kruger bo fetwa ke bja baeti ba bantši ba letšatši le letšatši le tlhabollo ya dikampa tše mpsha tše mmalwa. Mafelo a tlhago bjalo ka Yellow Stone le Yosemite kua USA a ile a swanelwa ke go lekanyetša palo ya baeti mengwageng ya go feta – ntle le lebaka le lengwe ge e se go imolla sephethephethe mafelong a tlhago! Go na le ditsela tša go fapanafapana tša go lekanyetša baeti, e lego go oketša tšhelete ya go tsena lefelong, go se dumelele bana lefelong, go dira dikgopelo tša sekgoba pele ga nako, go se dumelele baeti go sepelasepela ka lefelong ntle le mohlahli, go dumelela palo ye e lekaneditšwego ya baeti lefelong ka letšatši, go se dumelele dijo le dino lefelong, go se dumelele go tšea seswantšho, go thibela baeti tumelelo go mafelo a a kago senywa gabonolo goba go dilo tše botse tša bokgabo, bjalobjalo. Taolo ya boeti ga e bonolo bjalo ka ge gantši e bonala, gomme bjalo ka ge boeti e le ye nngwe ya diintasteri tše di golago ka lebelo, mathata a a tlo oketšega go e na le go fokotšega.
