Help
mollwane — Sesotho sa Leboa
Tlhomo le tlhalošo ya mellwane goba magomo a lefelo. Go ra gore go bea “mollwane”. Go akaretša go laetša bokgole bja lefelo le le rapamego le/goba le le tsepameng moo selo se se itšego se se fetogago (sebopego, boemo, pharologantšho, selo) se diregago, le tlhalošo ya magomo a tiragalo ya sona (goba kabo) mmepeng. Selo sa go fetoga e ka ba se sengwe le se sengwe go tšwa go setšhaba se se bolelago mmolelwana wo o itšego wa polelo, go ya go mehuta ya sewelo ya dimela goba mothopo wo o itšego wa minerale. Ke kgopolo ye bohlokwa kudu go Thutafase. Borathutafase ba ithuta makgwai a kabo ya sebaka a dilo tša go fetoga le maemo. Magomo a lefelo moo selo se diregago a hlongwa le go laetšwa mmepeng. Ka tsela ye, kabo ya sebaka ya selo e ya hlalošwa gomme ditikologo goba mafelo a tiragalo a beelwa mollwane. Mehlala ye mentši e ka bolelwa, eupša go fiwa ye mmalwa: dinaga di laetšwa ka mellwane ya boditšhabatšhaba; dilete tša go oma di laetšwa ka diaesohete tša pula; dilete tša go huma di laetšwa ka letseno la motho mang le mang la ngwaga ka nageng goba kelomoka ya ditšweletšwa goba ditirelo tše di abiwago ka nageng ka ngwaga o tee (GDP); dipayome di laetšwa ka mabaka a mehuta ya dimela le diphoofolo tše di lego mo go tšona; mafelo a a tletšego ka bosenyi toropong a laetšwa ke palo ya ditiragalo tša bosenyi tše di begilwego nakong ye e itšego. Ela hloko gore dikabo ka moka tša sebaka tše di boletšwego ka godimo, di ka hlalošwa ka mokgwa wa mebepe. Gomme borathutafase ba laetša mafelo ao a hlalošago dikabo tša sebaka. Mehleng ye, datha ye bjalo gantši e bolokwa disestemong tša tshedimošo tša thutafase (diGIS (Bona “dilete”.)
