Help
CBD, seletegare sa kgwebo — Sesotho sa Leboa
“Lefelo le bohlokwa la ditiragalo” toropong ke lefelo le bohlokwa la kgwebo (goba CBD). Ditoropo tša kgale lefaseng di hlabologile go tšwa go batho ba ba bego ba dula go dikologa lefelo le bohlokwa la ditiragalo, e ka ba go ananya dilo, go gwebišana, go phedišana le batho, ditlwaedi tša bodumedi goba ge ešita thuto. CBD ka setlwaedi e ba kgauswi le bogare bja lefelo la toropong gomme e na le mabenkele a magolo a go tsebalega, ditirelo tša botsebi le diofisi. Ke lefelo le bohlokwa la kgwebo le boithabišo, gomme le na le dinamelwa tša go ya mafelong a go fapanafapana. Mabenkele ka moka a kgwebo (bona “ditlabakelo tša kgwebo”), ditsebi le diofisi tša dikhampani tše kgolo tša boditšhabatšhaba gantši di hwetšagala go CBD, gomme neteweke ya dinamelwa e akanyeditšwe gabotse go rwala batho go ya le go tšwa lefelong leo. Go ya ka dimotlolo tša sebopego sa dinaga toropong sa kgale sa go tsebalega kudu, (gare ga tše dingwe, Burgess, Hoyt, Mann, le Ullman le Harris) CBD e ba go gongwe ka gare goba kgauswi le bogare bja toropo. Ditheko tša naga ka gare ga CBD gantši di godimo kudu, ke go re, go tura kudu go feta kae le kae khomplekseng ya ka dinaga toropong. Ditoropo tše ntši dinageng tša go fapanafapana di (ka mabaka a go fapanafapana) bile le diphetogo tše bohlokwa thulaganyong ya tšona ya sekgoba mo mengwageng. Ditoropo tše ntši di ile tša gola kudu mo e lego gore batho ba ile ba swanela ke go sepela bokgole bjo botelele go fihlelela CBD ya kgale (bona “kgolo ya toropo” le “mathata a dinamelwa”). Kgonthe ya “mošomo wa leeto” le leina la nako ya go sepela di tlišitše tlhabollo ya mafelo a morago a go tura a mabenkele le a kgwebo, kudu le ka diesteiti tša kgonthe tša go tura, mafelong a kgole le CBD ya kgale (bona “ditlabakelo tša kgwebo”). Ditoropong tše ntši tša kgale, diCBD ga di sa kgahliša go dikgwebo tša go tura, go ditiro tša ditsebi le boithabišo, gomme diCBD tša kgale di šwahletše ke batho ba ba se nago lefelo la go dula, kgwebišano ye e sego ya semmušo, ditiro tša bosenyi, bjalobjalo (bona “motšwasehlabelo”). Mpshafatšo (goba tsošološo leswa) ya diCBD tše di hlagetšego e diregile ditoropong tše ntši go ralala le lefase. Go nyakega tšhelete ye ntši go tšwa go makala a bosetšhaba le a praebete go ka bušetša CBD maemong a yona a kgale. CBD ya Johannesburg gabjale e mo go tshepedišo ya go nanya gape ya go fokola ya mpshafatšo.
