Help
khwaliti ya meetse — Sesotho sa Leboa
Dipharologantšho tša meetse tšeo di a dirago gore a nwege (bolokegilego gore batho ba ka a nwa) goba go se nwege eupša e le meetse ao a loketšego go nwewa ke diphoofolo, goba a bolokegile bjalo ka meetse a nošetšo, goba meetse ao a sa swanelwago go ka šomišwa pele a ka hlahlobja. Khwaliti ya meetse e laolwa ke dikateng tša meetse, ke go re, ke ditšhila dife le dilo tše dingwe tše di lego gona meetseng. Meetse ao a abelwago batho ditikologong tša ditoropong bjalo ka meetse a go nwa a hlahlobja kgafetšakgafetša. Teko ya meetse matšatšing a ke tshekatsheko ya ka pela ya khemikhale gape ye bonolo bjale ka ge ditshepedišo tša tlhahlobo tše bonolo di hlabolotšwe ka gobane di šomišwa kgafetšakgafetša le go šomišwa ke dilaporatori tše ntši. Diteko tše dingwe di ka dirwa lefelong, eupša go nepagala ga tšona ga go godimo bjalo ka teko ya kgonthe laboratoring ye e hlabolotšwego gabotse. Meetse a go nwa a swanetše go fihlelela maemo a a tiileng. Maemo a a hlaloša gore meetse a swanetše go ba le metswako ya tlase ye e itšego ya ditlhakantšhetšo tše di itšego tša khemikhale, gomme ga a swanela go ba le materiale ofe goba ofe wo kotsi wa okaniki woo Escherichia Coli goba E. coli e lego bohlokwa kudu. E. coli e tšwa go mantle gomme e baka bolwetši bjo bo kago ba kotsi go batho. Bogona bja yona ka dinako ka moka bo laetša gore mantle a goba a be a tšhilafatša kabo ya meetse. Maemo a meetse a go nwa a batho a swana kudu goba ganyane lefaseng ka moka, eupša dinageng tše dingwe maemo ga a šomišwe ka mo go tiileng. Meetse a ditšhila go tšwa ditirong tše di itšego tša moepo gantši a na le dilo tše di ntšhago dikhemikhale goba tša khemikhale goba dilo tše dingwe tše kotsi (bona “ditšhila tše kotsi) gomme a ke se šomišetšwe morero ofe goba ofe gomme a swanetše go hlahlobja pele a ntšhetšwa tikologong. Ye ga bjale ke taba ya maemo a godimo ka Afrika Borwa ka gobane meepo ye mentši e ntšhetša meetse a ditšhila tikologong. Meepo ye ga sa nke ya ba ka tlase ga dinyakwa tša semolao tša molawana wa rena wa go tia, wa bjale wa tikologo gomme ditirišo tša tlhahlobo ya ditšhila tša meepo ke tša kgale gomme ga di na kgahlego ya tikologo goba tša batho kua tlase ga moedi wa lefelo leo ba ntšhetšago meetse a bona a ditšhila. Ke kgothatšo gore ke meetse fela a khwaliti ya godimo ao a šomišwago intastering ya dijo gomme ka go lebiša go tšweletšo ya dijo tša bana le maswi a masea. Meetse a go nwa a go tlwaelega ao a abelwago batho ditoropong le ditorotswaneng tša Afrika Borwa, ke a khwaliti ye botse, eupša ga a lokela go ka šomišwa go tšweletša maswi a masea gomme a hloka tlhwekišo pele a ka šomišetšwa morero wo bjalo.
