Help
ekolotši ya ditoropong — Sesotho sa Leboa
Ditswalano magareng ga ditho tša okaniki (tše di phelago) le tše e sego tša okaniki (tša go se phele) ka gare ga mellwane ya skeipe sa toropo (bona “ekolotši”). Bjalo ka ge go na le dilo le diphedi tše ntši toropong, neteweke ya tsenelelano e raragane kudu. Go boima go ka gopola gore go na le tsenelelano magareng ga meago ye mebedi (e bitše A le B), eupša e gona. E tee ya yona e ka šitiša tumelelo go ye nngwe; ye nngwe e ka ba lefelo la mošomo la bašomedi ba bantši kudu moo e lego gore infrastraktšha e ka se kgone go emelana le nyako, ke ka lebaka leo bašomedi bao ba šomago ka moagong wa A gantši ba fihla morago ga nako ka gobane disestemo tša dinamelwa tša bohle ga di kgone go emelana le palo ya bašomedi bao ba šomago moagong wa B. Ka tsela ye e swanago kudu dibopego ka moka tša go dirwa ke batho toropong efe goba efe di a tsenelelana. Go oketša go seo, diphedi toropong (go akaretšwa batho gape le diphoofolo tša ka gae le tša lešoka) gape di tsenelelana le tše dingwe, gape le dibopego tša ponagalo ka gare ga toropo. Ekolotši ke lereo la kamano gomme toropo ga se selo ntle le ekosestemo (bona “ekosestemo”). Pabalelo ya ekosestemo efe goba efe e ithekgile go dilupu tša phetolo (bona “lupu ya phetolo”). Go na le dilupu tša phetolo tše ntši disestemong tša ditoropong. Go no swana le go diekosestemo tša tlhago, dilupu tše tša phetolo di bohlokwa kudu. Ge di ka phuhlama, khomplekse (tikologo) ka moka ya toropong e tla se laolege le tlhakahlakano moo bobe, bosenyi le bomenetša di tla atlegago. (Bona “msphafatšo ya meago”.)
