Help
ditirelo tša leago — Sesotho sa Leboa
Kabo ya semolao ya dilo tše di kgomegago le tša go se kgomege go fihlelela ditlhoko tša batho setšhabeng. Batho ba na le ditlhoko gape ba na le dinyakwa. “Dinyakwa” ke “dilo tše ba nyakago go ba le tšona” gomme maphelo a batho ga a ithekga go tšona. Go ka kgona go phela, ditlhoko tše di swanetše go fihlelelwa. Ditlhoko le tšona di fapafapane go tlogo go ditlhoko tša motheo (bjalo ka dijo le ntlo) go ya go ditlhoko tša maemo a godimo bjalo ka thuto ye e tšwetšegopele. Setšhabeng se sengwe le se sengwe, go na le boikarabelo bjo bo swanago go ka aba ditlhoko tša motheo tša batho ka moka, le go bao ba ka se kgonego go lefela. Boikarabelo bjo bja setšhaba bo fiwa mmušo goba bolaodi bjo bongwe bjo bo swanetšego go neela kabo ya ditirelo le go netefatša gore bahloki ba hwetša ditirelo tše bohlokwa, bjalo ka tlhokomelo ya tša maphelo, go ya sekolong, dintlo tše kaone, dijo tše di lekanego, meetse a go hlweka, le dinyakwa ka moka tša motheo tša go ka kgona go phela goba ga ešita le go ba le bophelo bjo bokaone. Bao ba kago kgona go di lefela ba lefa metšhelo go bolaodi go ka abela ditlhoko tša bao ba ka se kgonego go lefela ditirelo tše. Ge ditlhoko tša motheo tša bahloki setšhabeng di sa kgotsofatšwe, go ka ba le dikgaruru le go se tsepame setšhabeng. Pele ga ge batho ba ka dula mmogo metseng le ditoropong, sehlopha se sengwe le se sengwe sa lapa se be se swanetše go ikabela ditlhoko tša sona. Ge malapa a katologa go bopa meloko le ditšhaba, boikwelo bja setšhaba bo ile bja ba gona. Batho ba ile ba thoma go thušana, gomme kgopolo ya “go ba wa setšhaba” ya ba gona. Mehleng ye, ka setšhaba sa lefase sa go feta 50% se se dulago ditoropong, kabo ya ditirelo ke ye nngwe ya dilo tše di swanetšego go šetšwa kakanyetšong le tlhabollong ya dinaga ditoropong. Tshekatsheko ya sebaka e a dirwa go ka hwetša mafelo a makaone a dikolo, dipetlele, mebaraka, le tše dingwe.
