Help
kakanyetšo ya thutamahlale — Sesotho sa Leboa
Tšhišinyo ya thutamahlale yeo kgonthe goba bomaaka bja yona bo kago tsebagatšwa. Gomme, kakanyetšo ke setatamente sa thutamahlale se se kago “lekwa” le go kgonthišišwa (go tsebagatšwa gore ke nnete) goba go se amogelwe (go tsebagatšwa gore ke maaka). Gatee ge kakanyetšo e kgonthišitšwe go ba nnete, e amogelwa bjalo ka setatamente sa nnete, gomme ge e kgonthišitšwe go ba maaka, ga e amogelwe. Go bohlokwa gore kakanyetšo ya thutamahlale e be tšhišinyo ya imperikale ka kgopolo ya gore e ka lekwa (kgonthišišwa) ka boitemogelo. Ge e ka kgonthišišwa go ba setatamente sa nnete, e ka ba molao wa thutamahlale woo – gammogo le melao ye mengwe ye bjalo – o kago bopa ditumelo tša teori ye e itšego. Kakanyetšo e swanetše e be ye e ka lekwago; ge e ka se be ye e ka lekwago, gabotsebotse ke boikgopolelo, ga se kakanyetšo. Tše di bitšwago “dithutamahlale tše boima” bjalo ka khemistri le fisika, le tše di bitšwago “dithutamahlale tše boleta” bjalo ka saekholotši le sosiolotši di na le dipono tše di fapanego tša se dikakanyetšo, melao le diteori e lego tšona. Le ge thutafase e akaretša dithutamahlale tše boima le tše boleta, e na le go kgomarela pono ya boramahlale ba fisika ya se kakanyetšo e lego sona (se se tšwa nakong ya go ela ya mengwaga ya bo-1970 le bo-1980) eupša mokgwa wo ga sa nke o be wa lefase ka bophara, gomme le ga bjale ga o se wa ba wa lefase ka bophara.
