Help
ditlabakelo tša kgwebo — Sesotho sa Leboa
Mafelo le/goba menyetla ye e dumelelago barekiši le go dumelela bareki go ka gwebišana semmušo ditekanyo goba dibolumo tša dithoto tše nnyane goba tše ntši ka tšhelete goba ditho le ditirelo tše dingwe. Go tloga kgalekgale batho ba be ba gwebišana. Go na le ditsela tša go fapanafapana tša sekala sa fase sa kgwebo: go rekišetšana (ke go rekišetša kgogo ka moruswi wa gago wa todi); dithoto di ka gwebišana ka ditirelo (ke go thuša go kga diapola serapeng sa gago sa dienywa gomme ke amogela karolo ya puno bjalo ka mogolo wa ka), dithoto di ka rekišwa ka tšhelete (ke reka kgomo ya gago ka tšhelete ye go kwanwego ka yona), bjalobjalo. Dikgwebo tše di be di direga mo gohle, bjalo ka mebileng, dikhoneng tša mekgotha gape gantši lefelong la mmaraka wa go tlwaelega, wo o tsebjwago goba lebekeleng la lapa (lebenkele la spaza, ke g ore, lebenkele la motho go lelapa gomme le rekiša mohuta wo o itšego wa dithoto), goba seleteng sa gare sa kgwebo (CBD) bona “selete sa gare sa kgwebo”) sa toropo. Mafelo a bjalo a mmaraka gantši e be e eba toropo ka moka ya toropo ya kgale. Go ka reka goba go rekiša dilo, motho o be a eya go CBD. Ge nako e ntše e sepela, kgwebo e fetogile kudu, eupša ditsela tše tša go tlwaelega tša kgwebo di sa le gona ka dibopego tša go fapanafapana, kudukudu diekonoming tše di hlabologago, eupša gape go tše di hlabologilego le ge e le gore dithoto ga bjale di ka ba e le tša maemo a godimo. Infrastraktšha ye e nyakegago ditirong tša kgwebo e mpshafaditšwe gomme lehono bagwebi ba bantši ba gweba go tšwa mabenkeleng a bona a semmušo meagong ye e diretšwego thwii morero wo; mabenkele (barekiši) ga bjale a na le diaterese tša maleba tša kgwebo. Bagwebi ba reka dithoto ka bontši go tšwa diholoseleng gomme ba di rekišetša bareki ka ditheko tša godimo mabenkeleng a bona ao a nago le diaterese tše di sa fetogego. Theko ye moreki a yago go e lefela e ka no ba godimo ka gobane mogwebi o swanetše go lefela tšhelete ye ntši ya rente ya lebenkele gomme ditshenyagalelo tša gagwe di godimo go feta lefelong le e sego la semmmušo la mmaraka. Moreki o lefela ga nnyane (goba kudu) kudu go ka ba le monyetla wa go reka dithoto lebenkeleng le le lego lefelong la maleba. Ditoropong tše ntši tša sebjalebjale CBD ga e sa le lefelo la kgwebo, gomme kgwebišano ye ntši e direga meagong ye e rulagantšwego (bjalo ka dimolo le mafelong a mabenkele). Batho ba ka upša ba ya lefelong la mabenkele la kgauswi go e na le go ya go di-CBD go yo reka dilo tša bona tša letšatši ka letšatši tša go tlwaelega. Ka lebaka la tšhutišo ye ya lefelo ya mafelo a kgwebo, di-CBD tše ntši di tlogetšwe, dibopego tša go hlagala (bona “selete sa gare sa toropo” le “mpshafatšo”) moo kgwebišano ye e sego semmušo e diregago, ditiro tše di sego semmušo, le bobe di atlegago. Mohlala, go tla ba bonolo go reka crack-cocaine le go reka segwebakathobalano go CBD ya kgale, go e na le mmolong wa mabonwa dikarolong tše mspha tša toropo. Maiteko a semmušo a go “hlwekiša”, go tsošološa le go mpshafatša di-CBD tša kgale (bona “mpshafatšo”) nakong ye e tlago a ka šuthišetša mafelo a kgwebo morago go di-CBD, ga re a swanele go letela seo! Go feta mo, go renta go di-CBD tše di mpshafaditšwego go godimo kudu, gomme mong lebekele o tla swanela ke go lefela gagolo go feta pele. Gape, lefaseng le le hlabologago ga go na motho yo a ka nyakgo go lahlegela ke mabenkele a spaza ao a lego mo gohle!
