Help
selete — Sesotho sa Leboa
Sebaka sa ditekanyo tše pedi bogodimong bja Lefase. Ke sebaka se se kago hlalošwa seo se kago beelwa mollwane (bona “lefelo” le “go bea mollwane”) le go thalelwa mmepe. Gabotsebotse ke le lengwe la mareo a boima a thutafase go ka a hlaloša, eupša ditshwanelo tša thutafase tše bohlokwa kudu ke gore go na le momagano ka gare ga sebaka le gore sebaka se ka thalelwa mmepe (ke gore, magomo goba mellwane e ka hlalošwa). Bogolo bja sebaka ga bo bohlokwa; selete se swanetše go akaretša dikarolo tše kgolo tša lefase tšeo di akaretšago palo ya dinaga; se ka akaretša kontinente e nnyane ka moka, se ka emela karolo ye e itšego ya naga e tee, goba se ka ba se se nnyane bjalo ka meago ya mekgotha e mennyane ka gare ga toropo. Selo se bohlokwa ke gore go na le lebaka le le swanago sekgobeng sa leo le se hlaolago go tšwa dileteng tše dingwe. Mo Afrika se se bitšwago selete sa Matsha a Magolo se akaretša palo ya dinaga-baagišane tše di nago le mabaka a mmalwa a go swana ka lebaka la bokgauswi bja tšona le madiba a tšona a magolo. Bogare-Bohlabela (Middle-East) ke selete se se nago le palo ya dinaga tše di abelanago boemo bjo bohlokwa, e lego gore di seleteng sa Lefase se se nago le methopo ye mentši ya oli. Selete sa Aktika se emela tikologo ka moka ya lefase ye e lego leboa la mogaranafase wa 66½˚N (bona “lefelo”) gomme se akaretša karolo ya palo ka moka ya dinaga, bjalo ka USA (Alaska), Canada, Norway, Sweden, Finland, Russia le Greenland (ye e laolwago ke Denmark). Dikgwedi tše tharo tša go ba le mahlasedi a letšatši a tlase goba go se be le mahlasedi a letšatši le dithempheretšha tša tlase tša marega ke mabaka ao a tlwaelegilego go selete se ka moka. Ga ešita le mafelo a a sa kgokaganago gomme dikarolo tša ona tša go arogana di le dikontinenteng tša go fapanafapana tša bokgole bja diketekete tša dikilometara, di ka bonwa bjalo ka selete se tee, bjalo ka “mafelo a bjang”, ao a lego kua USA (moo go bitšwago diprairi), Russia (moo go bitšwago stepe), Argentina (moo go bitšwago pampas), Afrika Bohlabela (moo go bitšwago disavana [savannahs] le Afrika Borwa (moo go bitšwago nagagodimo le nagadithokgwa). Dilete tša tlhago tše ntši tše dingwe di ka bolelwa, go ya le ka mafelo a tšona lefaseng, klimate, dimela, bjalobjalo. Dilete tše di hlalošwago ke ditiro tša go tlwaelega tša batho ke tše ntši kudu. Setšo, bodumedi, polelo, tiro ya ekonomi, bokgabo, histori ya politiki, dikgahlego tša bjale tša politiki, dikgahlego tša kgwebo, le mabaka a mangwe a mantši a batho a ka ba le tlamo ya go swana magareng ga dilo tša sebaka tša go fapanafapana. Lefelo la Bohwa la Lefase la Motheo wa Tlhabologo ke tikologo goba lefelo le le itšego, la mmepe, ka gare ga selete se segolo se se nago le marapo a hominiti (batho ba pele) a mašaletša a mmalwa le dilo tša bokgabo. Mafelo a bohlokwa a mašalela a laeditšwe gomme lefelo le a lego ka gare ga lona le hlalošitšwe, le thaletšwe mmepe le go tsebagatšwa bjalo ka lefelo la bohwa la boditšhabatšhaba. Tsebagatšo ye e fa lefelo (sebaka) le le hlalošitšwego tšhireletšo ya go ikgetha (bona “mafelo a pabalelo” le “go beelwa mollwane”), eupša selete se mašalela a batho a lego ka go sona ke se segolo kudu go feta lefelo la bohwa.
