Help
ditiro tša ekonomi tša khwatenari — Sesotho sa Leboa
Kakaretšo ye e holago ya theknolotši ya maemo a godimo, ditirelo tša tshedimošo tša maemo a godimo, tsebo le bokgoni. Intasteri e thoma ka ditiro tše kgolo (temo, theo ya dihlapi, kagodikgwa le meepo) go ya go ditiro tša sekontari (tšweletšo le kago), go ya go ditiro tša thešiare (ditirelo tša botsebi, kamogelabaeng, go rekiša le dinamelwa), go ya go ditiro tša khwatenari tše di nyakago tsebo ye e tseneletšego le botsebi bja thekniki. (Bona “tlhabollo”, “ekonomi ya mohlakanelwa”, “dinaga tše di hlabologago” le “dinaga tše di fetogago”, “ditiro tša ekonomi tša sekontari” le “ditiro tša thešiare”.) Ka teori, dinaga ka moka (diekonomi) di feta go dikgato tše tša tiro ya ekonomi gomme bontši bja diekonomi tše kgolo lefaseng gabjale di dikgatong tša thešiare le khwatenari. Go tše dingwe tša diekonomi tše kgolokgolo (mohlala USA le England) tšweletšo e kgatha tema e nnyane ekonoming mola ditiro tša thešiare le tša khwatenari di bopa motheo wa ekonomi. Kotsi ye e lego gona maemong a bjalo e ile ya bonagala kudu ka go phuhlama ga ekonomi ya lefase ka 2008. Diekonomi tše di hlabologilego kudu tša Bodikela bja Yuropa le USA di ile tša amega kudu, eupša ekonomi ya Jeremane e ile ya se amege. Bjale ka ge Jeremane e na le lefapha la go tia la tšweletšo le intasteri, e ile ya se angwe kudu ke go phuhlama ga ekonomi. Diekonomi tše dingwe (mohlala USA, Britain, France, Italy, Japan le dinaga tše dingwe tša Yuropa) ga bjale di godiša ka mafolofolo mafapha a tšona a tšweletšo ka leswa, mola di le gare di matlafatša mafapha a tšona ao a hlokomologilwego a ekonomi ya praemari, go ka hwetša gape tekatekano ye kaone magareng ga ditiro tša tšona tša praemari, tša sekontari, tša thešiare le tša khwatenari. Ka lebaka la go phuhlama ga ekonomi ka 2008, go bile pepeneneng gore tekatekano magareng ga mafapha ka moka a ekonomi e a nyakega go ka matlafatša ekonomi ye e hlabologilego.
