Help
karogano — Sesotho sa Leboa
Mekgatlo ye e nago le pono ya go swana mabapi le taba efe goba efe ye bohlokwa e tla kgobokana go bopa dihlopha tša kgatelelo tša karogano tše di kago phegišana ka tsela ye e atlegilego. Go kopano efe goba efe ya mekgatlo ya kgahlego, karogano e ka se thibelwe go direga. E ka ba merero ya dipolitiki, ekonomi goba tikologo ye e sohlwasohlwago, go a tsebega gore bakgathatema ba ka se bone ka leihlo le tee. Mokgatlo wo mongwe le wo mongwe o tla thoma ka go nyaka go šireletša dikgahlego tša wona. O tla ba karolo ya sehlopha se se nago le dipono tše di swanago le tša wona. Kopano e tla ba ya dihlopha tša maikutlo a go fapana, gomme dihlopha tše pedi goba go feta tše maatla di tla ngangišana. Ditikologong tša dipolitiki le ekonomi, ditumelelano tša semmušo di ka fihlelelwa ke mekgatlo ya go bona ka leihlo le tee. Tše dingwe tša ditumelelano tše e ka ba tša mengwagangwaga gomme di ka kgona go emelana le dintwa, botšhošetši le tlhaselo ya lenaba. Mohlala wa go tlwaelega ke Mašolemašomammogo (Allied Forces) a Ntwa ya Bobedi ya Lefase ao a lwelego le Dinagatirišano (Axis States), eupša mohlaleng wo bontši bja dipotego bo ile tša fetoga morago ga ntwa gomme maikwelo a bonaba a tšwelela go seo e bilego Ntwa ya Molomo ya mengwaga ye 40. Kopano ya Afrika (AU) yeo e hlamilwego go tšwa go Mokgatlo wa Kopano ya Afrika (OAU) e tšwetše pele go ba gona le ge go be go na le palo ya dintwa magareng ga ditho tša ditšhaba ka botšona, eupša bobedi bja mekgatlo ye ga e a atlega go ka hloma khutšo le tlhabollo mo Afrika. Bjalo ka ge dipolitiki le ekonomi di kgokaganywa, maikutlo a go fapanafapana a dipolitiki le ekonomi le wona a a kgokaganywa. Bangwadi ba bangwe ba bona lefase le arogane magareng ga dihlopha tša ekonomi ye e hlabologilego le dihlopha tša dinaga tša ekonomi ye e sa hlabologago (goba ya go se hlabologe) (bona “tlhabollo ya ekonomi”, “Leboa le le hlabologilego” le “dinaga tše di hlabologago”). Le ge go le bjalo, matšatšing a lehono, dihlopha tša go tuma kudu tša ekonomi ke Sehlopha sa Dinaga tše Seswai (Group of Eight), dinaga tše di hlabologago le dinaga tša BRICS (bona “tlhabollo ya ekonomi”, “dinaga tše di hlabologilego” le “dinaga tše di hlabologago”). Tabeng ya tikologo, dikarogano di tlwaelegile, eupša e ba tše di hlephilego, tša go ikhola gape tša go fetoga. Dinaga tše dingwe di ka kgobokana nakong ya kopano ya Dinaga (bona “dikopano tša boditšhabatšhaba”) le go ganetša tše dingwe ka moka go ka rekiša mekgobo ya dithoto tša tšona tša manaka a tlou le a tšhukudu, gomme tša ganetša kudu mabapi le taba ya go swana kopanong ya go latela ya dinaga. Go seo se bitšwago “Seboka sa Lefase” (bona “toka ya tikologo”) dinaga tše di hlabologago (tša go diila) le dinaga tše di hlabologilego (tša go huma) di ile tša phegišana kudu dikarogong tše di bego di sa lebelelwa mabapi le boikarabelo bja tikologo le tšhilafalo ya moya. Eupša ka kakaretšo, dikarogano tša tikologo e ba tše di fetogago, tša go ikhola gape tša go nyalelana le taba.
