Help
meta datha — Sesotho sa Leboa
Se ke datha le tshedimošo mabapi le datha. Go thuto efe goba efe ya emperikale goba nyakišišo, datha e ya kgoboketšwa, eupša datha ka moka ye e kgobokeditšwego e ka ba ye e sa swanego ka khwalithi goba mohuta. Datha ye nngwe ke ya khwalithethifi gomme ye nngwe ke ya khwanthithethifi. Datha ya khwalithethifi le ya khwanthithethifi e nyaka mekgwa ye e fapanego ya tshekatsheko. Monyakišiši ka dinako ka moka o swanetše go sekaseka tlhago, nepo le tshephagalo ya datha yeo a e kgobokeditšego. Go pego efe goba efe ya dinyakišišo, go bohlokwa go hlaloša khwalithi ya datha (bona “datha ye bohlokwa”). Monyakišiši gape o swanela ke go dumela ge tše dingwe tša datha di sa tshephagale, a hlaloše gore ke ka lebaka la eng e tshephagala ga nnyane le go tiišiša gore ke ka lebaka la eng e sa šomišwa. Dipoelo ka moka tše di hweditšwego go tšwa tshekatshekong ya datha ye e tshephegago ga nnyane di swanetše go lekolwa ka tlhokomelo ye kgolo. Go mehuta ye e itšego ya dinyakišišo mongwe a ka kgoboketša datha ye ntši ye e tshephegago gape le datha ye nngwe ye e tshephegago ga nnyane. Lebakeng le le bjalo tshephagalo ya dipoelo tše e a fokotšega go ya boemong bja datha ye e tshephegago, le ge e le gore datha ye ntši e ka ba e le ye e tshephegago kudu. Ge datha ka moka ye e šomišitšwego tshekatshekong e le ya khwalithi ya tlase (boemo bja tlase bja tshephagalo) dipoelo, ka nnete, di a belaetša gomme dikhwetšo goba diphetho di swanetše go dirwa ka kelotlhoko ye kgolo ka mo go kgonegago. Go na le mabaka a mantši a gore datha e be ya khwalithi ye e fokolago, gomme go ka direga go mohuta ofe goba ofe wa dinyakišišo tša emperikale. Go dinyakišišo ka moka tša emperikale, meta datha e bohlokwa ka gobane e laetša tshephagalo ya diphetho. (Bona “datha ye bohlokwa”.)
