Help
go kgoboketša — Sesotho sa Leboa
Tlhalošo ye e ka bago ya kakaretšo ya kabo ya sekgoba ya selo se se fetogago ye e rilego lefelong le le rilego. Morerong wa tšona wa go hlaloša kabo ya sekgoba ya selo se se fetogago, borathutafase ba thala mmepe wa lefelo la go ithuta le go laetša lefelo ka moka goba mafelo moo selo se se fetogago e kago direga lefelong leo la go ithuta. Go swana le go šomiša sefo ya mašoba a magolo kudu go sefa mabele a magolo le a mannyane a mokgobo wa marathana a letlapa (bona “go thubja ga matlapa ke boemo bja boso” le “tšhutišo ya seloupu sa tlase sa mobu le matlapa”). Dikarolwana ka moka tša go feta mohlaba ka bogolo di a arolwa go marathana a letlapa, eupša re a tseba gore mokgobong wo o šetšego wa materiale, bogolo bja mabele e sa le selo se se fetogago kudu. Ka tšhupetšo ya kerafo, re ka thala mmepe wa kakaretšo wa kabo ya sekgoba sa, a re re, sa kabo ya lehumo ka gare ga toropo. Sa mathomo, re kgobokanya dintlo ka moka tše di nago le theko ya go feta R1 milione. Mafelo moo dintlo tše di lego gona a šupeditšwe mmepeng. Re ka humana palo ya tlase ya mafelo ao (re re, a mararo goba a mane). Ka tsela ye re tšweleditše mmepe wa kabo ya lehumo ka gare ga toropo. Eupša re a tseba gore tše dingwe tša dintlo mo mafelong ao a šupeditšwego di na le theko ya R10 milione, tše dingwe R5 milione gomme tše dingwe di na le fela R1 goba R2 milione gomme tše dingwe ga di na theko ya go ka fihla go R1 milione. Gabotsebotse re kgobokeditše datha, ke gore, re kgobokeditše felo gotee dintlo ka moka tša go tura toropongkgolo go humana seswantšho sa kakaretšo sa kabo ya lefelo la lehumo. Ge re nyaka go ka dira tshekatsheko ye kaone, re tla swanela ke go phatlalatša mafelo a “go huma” ka gare ga toropokgolo, ka go hlopha go ya pele. Gomme re šomiša sete ya kriteria ye e tiilego (go swana le sete ya disefo tše kaone) gomme ra fapantšha dintlo tše di fetago R10 milione ka theko go tše di nago le theko ya gare ga R8 million le R9,9 milione, bjalobjalo. Mafelo a mathomo a mararo goba a mane ao a laeditšwego a tla tlošwa gomme a bopa palo ye kgolo ya mafelo a mannyane. Ka tsela ye re thala mmepe wo o nago le dintlha tše ntši kudu le tšhupetšo ya rena ya bohumi e na le tshedimošo ye ntši go feta mmepe wo o thadilwego kgoboketšong ya datha. Thekniki ye e swanago e šomišitšwe go mehuta ka moka ya datha ya sekgoba, go fa mohlala kabo ya mehuta ya dimela, tiragalo ya mašoba a go nwelela, kabo ya mehlaka, kabo ya bafaladi nageng, bjalobjalo (bona “phatlalatšo”).
