Help
mebepe ya kadastrale — Sesotho sa Leboa
Mebepe ye e laetšago mellwane ya thuto le mellwane ye mengwe ya taolo, boingwadišo bja naga le tshedimošo ya mong wa thoto. Dithoto tša praebete le mmušo go ralala le lefase le le lekotšwego di ngwadišitšwe gomme dikantoro tša ditokumente di boloka direkoto ka moka le dintlha ka moka tša boingwadišo tša thoto. Mmepe ofe goba ofe wo o laetšago mellwane ye ke mmepe wa kadastrale. Mellwane ya boditšhabatšhaba, ya selete, ya naga, ya masepala le ya profense gape e ya laetšwa mebepeng e. Motho o hloka mmepe wa sekala se segolo (go swana le 1:50 000) go laetša mellwane ya dipolase, eupša ga gona dithoto tše nnyane tša motse tše kago laetšwa ka mmepe sekaleng seo. Go dithoto tša motse, tša go swana le tše di lego sabapong ye itšego sa toropo, sekala se segolo (bjalo ka 1:10 000 goba ge go kgonega sa 1:1 000) se ka hlokega. Mebepe ya kadestrale e bohlokwa peakanyong ya motsesetoropo, kabong ya ditirelo, kgoboketšong ya motšhelo wa thoto, thekišong ya thoto, tharollong ya dithulano tša mellwane le go ba mong wa thoto, ditshekatshekong tša sekgoba, dinyakišisong tša tšeotheknikhale, ditekolong seabeng sa ditekolo tša tikologo, gape le mererong ye mengwe ye mentši. Ka Afrika Borwa re ba lehlogonolo go ba le melokoloko ye mebotse ya mebepe ya kadastrale dikaleng tše di fapafapanego. Sa go swana le se se ka se bolelwe ka dinaga tše ntši tše di hlabologago. Mekgwa ya go ba mong wa naga e ya fapana go tloga seleteng go ya go se sengwe Lefaseng. Dileteng tša magaeng, boingwadišo bja naga le mmepe wa kadastrale ga di šome. Go USSR ya maloba, naga ka moka e be e le ya Mmušo, gomme go be go sena mokgwa wa kadastrale wo o bego o šomišwa go fihlela phedišong ya USSR ka 1991 gomme bong bja naga bja praebete ya ba karolo ya boamaruri bja bona bjo boswa. Leganateng la Sahara setšhaba sa basepedi sa Bedouins se šutha go tloga Sedibeng go ya go se sengwe (bona “go kgobokelana ga letswai mobung”) gomme ga ba tsebe gore ba nageng efe nakong ye e rilego! Eupša setšhaba sa basepedi se tseba “mong” wa sediba, didiba tšeo di kago šomišwa le gore ke dife tše di swanetšego go efogwa. Ka lebaka leo ga ba hloke mebepe ya kadastrale go rarolla ditaba tše. Go no ba bjalo le ka dilete tše ntši bjalo ka dithokgwa tša Amazon, maganata a Mongolia, disavana tša magaeng le mafulo a East Afrika, ditundra tša molaleng tša Patagonia, meboto ye megolo ya Himalaya, bjalobjalo. Gabotsebotse, karolo ye kgolo ya naga Lefaseng ga e na mmepe wa kadastrale, ka ge go be go se na tlhoko ya wona.
