Help
go hwetša tshedimošo o le kgole — Sesotho sa Leboa
Go hwetša datha mabapi le selo o le kgole ka go šomiša setlabakelo sa go ikgetha – sensara – seo se sa kgomanago le selo. Setlabakelo e ka ba khamera, sedidirišwa sa sonar, sekena sa makhenikhale, sestemo ya radar, sensara ya phišo ya mahlasedi ya elektromakenete yeo e lego godimo satelaeteng ya obiti ya Lefase. Dilo ka moka tša tlhago le tša go dira ke batho tša themperetšha ya godimo go feta nnoto ye e feletšego (ke go re, nnoto sekaleng sa Kelvin, goba -273,16˚C) di ntšha maatla a elektromakenete gomme disensara tše di itšego di ka hwetša dintšhetšo tše. Dilo tša go fapanafapana di ntšha botelele bja maphoto bja go fapanafapana bja maatla a elektromakenete gomme re ka aga disensara tša go se swane tše di kago hwetša botelele bja maphoto a phišo ya mahlasedi. Khamera ya go tlwaelega ya go swana le ye e lego sellathekeng sa gago e ka hwetša bokgole bjo bo lekaneditšwego bja botelele bja maphoto a phišo ya mahlasedi, e lego ao a bonagalago karolong ya spektramo – wona a re kgonago go a bona ka mahlo a rena. Ditlabakelo tša lasere di ka ntšhetša botelele bja mahlasedi ka ntle ga spektramo se se bonagalago ka poelo ya gore re ka se kgone go bona mahlasedi ge fela a ka bonagatšwa ke selo. Se se šomišwa go seabe se se botse ditšweletšong tša paesekopo le dikhonsateng tša mmino wa pop, eupša se dirišwa kudu mererong ya thutamahlale ya bona fide, ya sešole le ya maphelo. (Diswantšho tša sonar gantši di dirišwa mafapheng a sešole le kalafo, eupša seo ke selo se se fapanego kudu. Maphoto a modumo a ntšhwa ke setlabakelo gomme setlabakelo seo se hwetša maphoto ge a boela morago go tšwa go selo se a bego a lebile go sona. Ka theknolotši ya sonar ngwana a ka bonwa gabotse ka gare ga popelo ya mmagwe.) Go bohlokwa go ela hloko gore seswantšho sa moyeng sa go tlwaelega se ka hlalošwa ntle le tshepetšo ya datha ye e tšerwego go sona. Le ge go le bjalo, ga go bjalo ka seswantšho sa satelaete seo se swanetšego go rulaganywa pele se ka hlalošwa.
